Skíðabraut 7B

Skíðabraut 7B / Jónínubúð á Dalvík - Paradís útivistarfólksins -Virkilega skemmtilegt einbýlishús á góðum stað á Dalvík sem hefur verið innréttað sem skíðaskáli
Húsið er með skráð byggingarár 1930 og 1977 en þá var byggt við það til norðurs. Núverandi eigendur keyptu eignina árið 2011 og fóru þá í miklar endurbætur. 

Eignin skiptist í forstofu, eldhús, stofu, fjögur svefnherbergi, snyrtingu, baðherbergi og rúmgóða skíðastofu.

Forstofa er með flísum á gólfi. 
Eldhús, handsmíðuð innrétting af eigendum, klædd með bandsöguðu Birki úr Heiðmörk og flísar á gólfi. Eldhúsborðið er einnig smíðað af eigendum með efni úr þakinu á gamla leikhúsinu á Dalvík. 
Skíðastofan er um 45 m² alrými sem skiptist í stofu, borðstofu og aðstöðuhorn fyrir skíði o.fl. Gólfið er timburgólf úr rekaviði af Skaga. Gólfið er lektað upp með 30 mm listum og liggja ofnalagnir í rýminu milli lekta. Loftið er tekið upp og betrekað með íslenskum landakortum. Gluggar eru til tveggja átta og gönguhurð út. 
Svefnherbergin eru fjögur, öll ágætlega rúmgóð. Möguleiki er að koma fyrir fimmta herberginu.
Baðherbergi er með epoxy efni á gólfi, handlaug og sturtu með skilrúmi úr rekaviði. Tengi er inni á baðherberginu fyrir þvottavél. Hurð er út af baðherberginu á verönd sem er með heitum potti/skel.
Lítil snyrting er við hliðina á baðherberginu með flísum á gólfi. 

Á baklóðinni er verönd, bæði úr rekaviði og hellum og með heitum potti - Útsýni úr pottinum yfir Flæðurnar,  fuglafriðland Svarfdæla

Við endurbætur á eigninni fengu margir hlutir nýtt líf,  flutt voru á staðinn um 4,5 tonn af rekaviði frá Skagaströnd, fengið heillegt efni úr kaupfélagshúsinu á Dalvík þegar þar var unnið að þakframkvæmdum og afgangsflísar frá flísabúðum. Þá var efni í innréttingar keypt í Efnissölunni og klæðning á eldhúsinnréttingu hjá skógræktinni í Heiðmörk. 

Hluti af húsbúnaði getur fylgt með við sölu eignar.
Möguleiki á ljósleiðara er til staðar.

Hér er um að ræða einstaka eign sem hentar vel fyrir stórfjölskylduna eða hverskyns útivistarhópa.