Aðalbraut 16

Aðalbraut 16 á Raufarhöfn – gistiheimili með öllum búnaði og fjölbreyttum möguleikum Til sölu er um 508 m² hús á þremur hæðum ásamt kjallara við Aðalbraut 16 á Raufarhöfn.
Eignin skiptist í sjö matseiningar samkvæmt fasteignaskrá og stendur á 1.010 m² lóð. Í húsinu hefur um árabil verið rekið gistiheimili við góðan orðstír.
Töluverðar endurbætur hafa verið gerðar innanhúss og fjárfest í húsgögnum, tækjum og öðrum búnaði til gistirekstrar. Allur búnaður fylgir með við sölu, sem skapar góðan grunn fyrir nýja eigendur til að halda rekstrinum áfram. Endurbætur og búnaður: Meðal nýrra tækja eru iðnaðarþvottavél, iðnaðarþurrkari og tveir ísskápar. Allar eldavélar hússins eru nýjar. Eldhús eru búin fjölbreyttum eldhús- og borðbúnaði, þar á meðal glösum, diskum, hnífapörum, pottum og pönnum. Aðstaða gesta hefur verið bætt með húsgögnum, gardínum og teppalagningu. Í húsinu eru meðal annars ný setustofa og setustofa með eldhúsi. Nýir bekkir eru í móttöku, nýjar skóhillur og ný borð og stólar í öllum einstaklingsherbergjum. Í herbergi 31 er svefnsófi sem nýtist sem aukarúm. Þá fylgja sjónvarpsbúnaður, lampar, bækur og lyklakippur merktar gistiheimilinu. Þvottaaðstaða er í húsinu og gestir hafa aðgang að þvottavél og þurrkara. Þar eru einnig sturtuklefi og sérstök starfsmannasturta. Tenglar hafa verið endurnýjaðir víðs vegar og ljósleiðaratenging er til staðar. Í rekstrinum eru fyrirliggjandi tengingar við bókunarkerfi og ferðaskrifstofur, auk þess sem bókhaldsþjónusta hefur verið nýtt við reksturinn. Ástand og nýtingarmöguleikar Húsið er klætt að utan með stálklæðningu. Gera þarf ráð fyrir endurnýjun stálklæðningar og stórs hluta glugga hússins. Eignin býður upp á fjölbreytta nýtingarmöguleika, meðal annars áframhaldandi gistirekstur eða skiptingu í allt að fjórar íbúðir, að fengnum tilskildum leyfum. Rýmið, aðstaðan og búnaðurinn gefa nýjum eigendum fjölmörg tækifæri til áframhaldandi uppbyggingar. Umhverfið Raufarhöfn stendur við austurströnd Melrakkasléttu, þar sem nálægðin við hafið, víðáttan og bjartar sumarnætur setja svip sinn á umhverfið. Heimskautsgerðið rís á hæðinni ofan við þorpið og náttúra svæðisins býður upp á kyrrð og fjölbreytta útivist. Áhugavert tækifæri fyrir þá sem vilja sameina búsetu og rekstur eða þróa áfram rúmgóða eign á norðausturhorni landsins.