Bláskógar 6 - 6B og 6C

Valborg fasteignasala kynnir í einkasölu Seyðtún (Bláskóga 6) auk lóðanna Bláskógar 6B og 6C, 810 Hveragerði. 

Sum hús eru byggð til að búa í, önnur verða hluti af sögu bæjarins. Bláskógar 6 tilheyrir hvoru tveggja. Húsið var hannað og reist árið 1945 af listmálaranum Kristni Péturssyni og stendur enn í dag á fallegri, gróinni lóð þar sem kyrrð, saga og náttúrufegurð fara saman. Hér sameinast hlýlegt heimili, glæsileg útiaðstaða og einstakur karakter sem verður ekki endurskapaður. Svo má lesa neðar texta úr endurminningum Kristins en niðurlag textans segir: "Þessi stutta upptalning þess, sem hér fyrir augum ber, út um glugga og af hlaðvarpa í Seyðtúni, ætti að gefa smá hugmynd um, hvað ríkdómur náttúrunnar er hér á borð borinn fyrir þá, sem vilja sjá og geta séð dásemdir hinnar ósnortnu náttúru. Slíkt umhverfi ætti að orka á og móta aðra manngerð en þá, sem lifir og hrærist í öngstrætum stórborganna."

Um er að ræða Bláskóga 6 sem er tvílyft einbýlishús, útleigueiningu, gróðurhús, garðskúr, skráð samtals 240,6 m² hjá Þjóðskrá Íslands en lóð eignarinnar er skráð 1.240,8 m².
Skipting eignanna er sem hér segir:
Eining 01-0101 er tvílyft einbýlishús, skráð 144,8 m². Eignin er: Á jarðhæðinni er forstofa, alrými sem í er eldhús - stofa - borðstofa, baðherbergi, þvottahús/geymsla. Á efri hæð eru þrjú rúmgóð svefnherbergi. Byggt 1945.
Jarðhæðin er að mestu leiti flísalögð, fyrir utan þvottahús. Hátt er til lofts í alrými (eldhús/stofa/borðstofa) og þakluggar eru yfir því rými. Arinn er í stofu. Rúmgott baðherbergi og sér rými sem í er sturta. Þvottahús er mjög rúmgott og nýtist einnig sem góð geymsla. Stigi upp á efri hæð er teppalagður, sem og svefnherbergisgangur efri hæðar. Opið þaðan niður í alrými hússins. Þrjú svefnherbergi á efri hæð, öll með parketi á gólfum.  
Eining 02-0101 er íbúð, skráð 63,0 m². Var áður bílskúr, er í dag þriggja herbergja íbúð auk geymslu. Eignin er: Íbúðin er forstofa, tvö svefnherbergi, alrými sem í er eldhú - stofa - borðstofa, baðherbergi, risloft. Auk þess er geymsla aðgengileg um annan inngang, ótengdan íbúðinni. Byggð 1990. 
Eining 03-0101 er baðhús, skráð 19,3 m². Var nýtt sem sér útleigueining og gæti orðið það aftur. Þar er fullbúið eldhús og baðherbergi. Byggt 2017.
Eining 04-0101 er gróðurhús, skráð 13,5 m². Vandað upphitað Serralux gróðurhús frá Filclair í Belgíum, með ræktunarhillum en einnig er hægt að rækta í gólfi. Umboðsaðili er Lágafell. Byggt 2004.
Auk þess eru tvö óskráð heilsárshús á lóðinni, samtengd með yfirbyggðu þaki. Með þeim er fermetratala eignanna orðin um 270 m².
Stór sólpallur með heitum potti er haganlega fyrirkomið á skjólsælum stað.
Bílaplan er æði stórt, snjóbræðsla til staðar.
Lóðin er skráð 1.240.4 m² og er á henni mikill gróður. Sjá uppl um heildarlóðastærðir hér fyrir neðan.

Fyrir nokkrum árum var lóðin minnkuð úr 2.338,9 m² og stofnaðar út úr henni tvær byggingalóðir, sem fylgja með. hægt er að byggja á þeim, selja þær út úr pakkanum eða nýta þær til að hafa stærri lóð til suðurs. Skráning þeirra er sem hér segir:
Bláskógar 6B er skráð 327,9 m² byggingarlóð en gert er ráð fyrir einnar hæðar einbýlishúsi á lóðinni. Nýtingarhlutfall er að 0,3.
Bláskógar 6C er skráð 806,6 m² byggingarlóð en gert er ráð fyrir einnar til tveggja hæða einbýlishúsi á lóðinni. Nýtingarhlutfall er að 0,3.
Heildarstæð lóðanna er því 2.338,9 m².

Bláskógar 6 – einstök fjölskyldueign með sögu, sál og fallegri lóð
Það er sjaldgæft að eign bjóði upp á jafnmikla sögu og persónuleika og Bláskógar 6 gera. Húsið var hannað og reist árið 1945 af listmálaranum Kristni Péturssyni sem valdi Hveragerði sem heimili sitt og vinnustað. Þar skapaði hann verk sín í sérstakri vinnustofu sem var hluti af húsinu og eignin hefur síðan verið hluti af þeirri einstöku sögu sem mótaði Hveragerði sem listamanna- og garðyrkjubæ.
Á rúmgóðri og gróinni lóð ríkir einstök kyrrð og skjól. Þar sameinast fallegur garður, gróðurhús og góðar aukabyggingar í umhverfi sem býður upp á fjölbreytta möguleika til útleigu, útivistar, ræktunar og notalegrar samveru.
Húsið hefur tekið breytingum í takt við tímann en heldur jafnframt í þann karakter og hlýju sem einkenna vandaðar eignir frá fyrstu uppbyggingarárum Hveragerðis. Hér gefst einstakt tækifæri til að eignast fallegt heimili þar sem saga, náttúra og nútímaleg lífsgæði mætast á einstaklega eftirsóttum stað.
Bláskógar 6 er ekki aðeins hús – heldur heimili með sögu sem heldur áfram með nýjum eigendum. Sjón er sögu ríkari.

Eignin virðist hafa fengið gott viðhald í gegnum árin en um síðustu aldamót voru bæði íbúðarhúsin mikið endurnýjuð. Viðhalda á gluggum (gler og timbur eftir atvikum), rafmagns- og vatnslagnir endurnýjaðar að hluta, gólfefni, ytra byrði húsa sem og þökum.

Í Þjóðskjalasafni Íslands er varðveitt handrit af endurminningum Kristins Péturssonar (1896-1981), myndalistamanni og kennara, sem hann ritaði eftir dagbókum og minnisblöðum á árunum 1972-1979. Honum entist þó ekki ævin til að ljúka ritun endurminninganna og kom hann þeim sjálfur til varðveislu í Þjóðskjalasafni skömmu fyrir andlát sitt. Í þessum skjölum er meðal annars að finna frásögnina „Útsýnishringurinn“ þar sem hann lýsir því sem fyrir auga ber frá húsi hans Seyðtúni, Bláskógum 6.
 
Heimild: ÞÍ. Kristinn Pétursson (1896-1981) myndlistamaður og kennari 0/263. A/1, örk 1.
 
Útsýnishringurinn
Það, sem heillaði mig hvað mest fyrst er ég kom í Hveragerði, var lega þorpsins, fjöllin að norðan við það en opið á móti suðri út að haffletinum. Þar sem ég ólst upp voru há fjöll bæði norðan og sunnan við, svo að sól sást ekki um sólhvörfin á annan mánuð. En eitt er sama hér og þar. Ég var sunnan undir fjalli og sjór sunnan við, mjór fjörður.
              Úr vinnustofuglugganum blasir við Reykjafjöll og samnefndur dalur fjær, en hverasvæðið nær og húsin við það. Um sólstöður roðar miðnætursólin skýin yfir dalbotninum um lágnættið. Yndislegasta stund hins sólbjarta sólarhrings. En upp yfir hábungu Reykjafjalls gægjist bæði sól og máni, þegar þau eru í hágöngum sínum
              Stærri gluggi Hillunnar er snýr suðaustur og lítill hár kíkgluggi í suðvestur, eru gluggar aðal vistarveru minnar, er ég ekki er að mála, en les, skrifa, teikna eða slappa af á einn eða annan hátt. Það herbergi er mér kært og þar hef ég lifað margar góðar stundir í einveru minni í þessu húsi. Þegar sólin er að koma upp, áður en hún sést hér koma upp yfir Reykjafjall, sér maður sólskinið yzt í Ölvesinu, sem svo smá færist upp eftir sléttlendinu unz skyndilega, að húsið hér stendur baðað í sólskininu. Á sumrin er það dýrleg sjón og tilfinning að sjá sólskinið feta sig svona áfram í átt til manns. Þá er sælt að vera til.
              Ísnúnu ávölu hæðirnar og hvilftirnar ofan á Reykjafjalli eru heilleg og mjúk form. Í gegnum brúnir þeirra skerast svo vatnsgilin gróf og hrá. Þar blasir við nyrzt Stekkjartóftin í hlíðinni fyrir ofan gamla Reykjarbæjarstæðið. Það fyrsta sem grænkar á vorin af úthögum. Svo kemur Ingólfsfjall framundan Reykjarfjalli með sína ávölu jökulnúnu bungu og bröttu sæbörðu sæhamra framan á og Kögunarhól framan við eins og kögur á skrautflík, sem mild endimörk þess mæta fjalls. Því næst er það hafflöturinn eða réttara sagt hafröndin fyrir öllu suðrinu allt vestur að Núpum. Dásamlega fyrirkomið, allt suðrið opið að hafsbrún. Kemur það bezt í ljós þann tíma, er sólin aðeins rennir sér þar upp yfir hafflötin svolitla stund um vetrarsólhvörfin unz hún fer aftur að teygja úr göngu sinni og hverfa bak við Núpana, unz um sólstöður hún gengur fyrst til viðar nyrzt fyrir norðan Kamba, í næst nyrsta skarði á Ástaðafjalli, og roðar nokkru síðar yfir dalbotni Reykjadalsins, sem fyrr segir og er þá aftur nóttlaus veröld og sól í sinni.
              Hverfum nú aftur að nærútsýninu um austurglugga Hillunnar, hinu stöðuga nærsýni hverasvæðisins með öllum sínum gufustrókum og gjósandi borholu, sem aldrei hefur orðið til neins nýt, annars en gleðja auga ferðamanna, mín og máske fleiri. Heyri ég oft drunur hennar jafnt um niðdimmar skammdegisnætur sem sólbjarta morgna. Hún er dyntótt og mislynd eins og flestir, sem fara aðeins sýnu fram. Ekki vildi ég samt býtta á henni og hinni frægu þrýstibunu upp úr Genfarvatni. Vélrænni og kaldri í alls konar merkingu, sem þó er tákn þeirrar fögru borgar. Bakvið duttlungasama heita gosbrunn sér til austurhluta bæjarins og svo litla smugu inn á aðalgötuna, Breiðumörk, þar sem þó oftast eru einhver lífsmörk. En alltaf er líf og hreyfing í útsýninu út yfir hverasvæðið. Slappi maður af getur maður gefið sig á vald hinna dansandi gufustróka og gufuhnykla, er svífa um loftið og eyðar og hverfa eins og allt annað lifandi og hverfult.
              Fari ég út á útisvalirnar og horfi í vestur og sé ekki upptekinn af gangi sólar, sé ég hraunstraumana steinrunnu, er eitt sinn runnu niður hamrana, er mynduðust, er brimið gnauðaði við þá og staðurinn er hús mitt stendur á var niður á þyrskilngamiðum fram undan Hamrinum. Þegar loks hraunstramarnir runnu þar niður í mörgum lögum, breyttu þeir standbjörgum í ávalar brekkubungur, sem vagnar og bílar hafa skáskorið sig upp. Svona vinnur oft gamli tíminn fyrir nýjum tímum og hans þörfum. Þessir hraunstraumar voru mér hugþekkasta viðfangsefnið á fyrstu árum mínum hér.
              Loks er það svo sjálfur Hamarinn falinn af húsum, en sést þó á báða enda hans frá ytri og inni svölunum í gegnum vinnustofugluggann. Lengi var hann mér hið helga fjall, sem ég hafði oft viðskipti við eins og aðrir musteri sitt. Ég fékk mér gönguferðir bæði utan með honum og yfir hann. Hann hefur upp á margt að bjóða. Á kollinum eru ísnúnir ávalir bergflókar frá ísaldartíma með margvíslegum rispum og rákum, sem sýna stefnu ísaldarruðninganna. Síðar hefur þar í slökkunum myndast þykkur jarðvegur, sem nú er að mestu blásinn burtu, þó er þar ein uppblásturstorfa eftir ennþá um tveggja mannhæða hás, síðasta merki þess er var. Eitt tímanna tákn af mörgum, er snerta tímaskyn mitt. Neðan við Hamarinn er hin forna strandlína, er ég nefndi hér áðan, þar sem útaldan svall í beinni línu frá Suðurheimskautslandinu, þá var allt stórt í sniðum hér, brimsorfin björgin í brimgarðinum, en nýbrotin björgin rétt ofan við með sínum nýju brotflötum. Þessi lína er ennþá skörp og skilmerkileg.
              Þessi stutta upptalning þess, sem hér fyrir augum ber, út um glugga og af hlaðvarpa í Seyðtúni, ætti að gefa smá hugmynd um, hvað ríkdómur náttúrunnar er hér á borð borinn fyrir þá, sem vilja sjá og geta séð dásemdir hinnar ósnortnu náttúru. Slíkt umhverfi ætti að orka á og móta aðra manngerð en þá, sem lifir og hrærist í öngstrætum stórborganna."
Aðstoð við upplýsingaöflun þessa; Söguferðir í Hveragerði, vefsíða þeirra er hér.

Aðrar eignir sem við seljum má sjá hér.

Nánari upplýsingar veita:
Elínborg María Ólafsdóttir, löggiltur fasteignasali, í síma 861-6866, tölvupóstur elinborg@valborgfs.is.
Gunnar Biering Agnarsson, löggiltur fasteignasali, í síma 823-3300, tölvupóstur gunnar@valborgfs.is. 

Forsendur söluyfirlits:
Söluyfirlit er samið af fasteignasala í samræmi við ákvæði laga nr. 70/2015. Þær upplýsingar sem fram koma í söluyfirliti þessu eru sóttar í opinberar skrár, til seljanda sjálfs og eftir atvikum til húsfélags. Seljandi veitir upplýsingar um eign í samræmi við upplýsingaskyldu laga um fasteignakaup nr. 40/2002. Fasteignasali sannreynir að þær upplýsingar séu réttar með sjónskoðun á eigninni. Fasteignasali getur ekki fullyrt um ástand og eiginleika þeirra hluta fasteigna sem ekki eru aðgengilegir og sjást ekki berum augum, t.d. lagnir, dren, skólp og þak.

Um skoðunar- og aðgæsluskyldu:
Í lögum um fasteignakaup nr. 40/2002 er kveðið á um ríka skoðunarskyldu kaupenda á fasteignum. Valborg ehf. fasteignasala bendir væntanlegum kaupendum á að kynna sér vel ástand fasteigna við skoðun og fyrir tilboðsgerð og ef þurfa þykir að leita til sérfræðinga um nánari ástandsskoðun.

Gjöld sem kaupandi þarf að standa straum af vegna kaupanna:
1. Stimpilgjald af kaupsamningi sem er hlutfall af fasteignamati. Stimpilgjald er 0,8% fyrir einstaklinga (0,4% við fyrstu kaup) og 1,6% fyrir lögaðila.
2. Þinglýsingargjald af kaupsamningi, veðskuldabréfum, veðleyfum o.fl. Þinglýsingargjald er kr. 3.800,- fyrir hvert skjal.
3. Lántökugjald lánastofnunar. Um lántökugjald vísast í gjaldskrá viðkomandi lánveitanda.
4. Umsýsluþóknun fasteignasölu skv. gjaldskrá.
5. Ef um nýbyggingu er að ræða greiðir kaupandi skipulagsgjald, 0,3% af brunabótamáti, þegar það er lagt á.