Hæðargerði 29b

Gallar og atriði sem kaupanda er sérstaklega bent á

Eftirfarandi atriði eru þau sem seljanda og fasteignasala er kunnugt um. Upplýsingar seljanda eru úr skriflegum svörum hans 24.08.2026 og tölvupósti 10.10.2026 um skoðun á þakrými. Að auki eru tekin með atriði sem áhugasamur kaupandi benti á eftir að hafa skoðað eignina og þakrýmið með smið (tölvupóstur 06.10.2026); þau atriði hefur seljandi ekki staðfest sérstaklega og eru merkt sem slík.
Móða milli glerja í gluggum: Seljandi hefur upplýst um móðu í að minnsta kosti tveimur gluggum eignarinnar; áhugasamur kaupandi taldi móðu í að minnsta kosti fjórum gluggum við skoðun. Skipt var um flest allt gler í húsinu um 2017 eða fyrr, að sögn seljanda áður en hann keypti eignina; nákvæmt ártal liggur ekki fyrir.
Pallur á lóð: Pallur við húsið er kominn til ára sinna. Hann var málaður 2022. Undirstöður (dvergar) hafa verið settar niður vegna fyrirhugaðrar stækkunar pallsins en stækkunin var ekki framkvæmd.
Eignin er að miklu leyti upprunaleg frá byggingarári 1985. Innréttingar, gólfefni, lagnir, hitakerfi og rafmagnstafla eru að mestu frá þeim tíma nema annað sé tekið fram í lýsingu; rofar og tenglar voru endurnýjaðir að miklu leyti 2021.
Þak: Þakrýmið var skoðað 10.10.2026 af Jóni Ólafi á vegum seljenda, eftir að áhugasamur kaupandi spurði um loftun þaksins. Niðurstaða hans: öndun þakrýmis er eðlileg miðað við byggingartíma hússins, þá var ekki notast við öndunarrör eins og gert er í dag; auðvelt er að bæta rörum við en að hans mati er ekki þörf á því. Timbur í þaki lítur vel út. Lekið hefur með stökum nöglum, sem er ekki óalgengt í eldri húsum, og má laga með því að skipta nöglum út fyrir skrúfur. Komið er að endurnýjun þakjárns, en henni má að hans mati fresta um allt að 10 ár með því að skrúfa járnið niður og mála það. Kostnaður við járnskipti er áætlaður að hámarki um 2.000.000 kr. í efni og 2.000.000 kr. í vinnu. Jón Ólafur hefur boðist til að staðfesta þetta mat skriflega og sú staðfesting fylgir sölugögnum þegar hún liggur fyrir. Áhugasamur kaupandi, sem skoðaði þakrýmið með smið, hefur hins vegar fengið það ráð frá smiðum, verkfræðingi og arkitekt að bæta loftun við þakrýmið; verðtilboð sem hann aflaði í þá framkvæmd með frágangi á þakskeggi var um 500.000 til 1.000.000 kr. Kaupendum er bent á að meta þetta sjálfir með aðstoð fagmanns.
Ábendingar kaupanda eftir skoðun þakrýmis með smið (06.10.2026), ekki staðfestar sérstaklega af seljanda: Rakavarnarlag í þaki er rofið á stöku stað, þar sem farið hefur verið í gegnum það með tölvulögnum (cat-lögnum) og loftun frá baðherbergi. Op er úr bílskúr upp í þakrými hússins. Kaupendum er bent á að kynna sér þessi atriði við skoðun.