Ægisbraut 2

Domus fasteignasala kynnir til sölu Ægisbraut 2 á Blönduósi, 423,3 m² atvinnuhúsnæði frá árinu 2022 á 1.894 m² iðnaðar- og athafnalóð. Húsið var sérhannað fyrir matvælavinnslu og framleiðslu heilsuvara og hefur hýst starfsemi Foodsmart Nordic.

Húsnæðið skiptist í vinnslu- og geymslurými, tæknirými, hreinlætisaðstöðu og starfsmannaaðstöðu á efri hæð. Mikil lofthæð í vinnslusölum, fimm innkeyrsluhurðir og aðskilin rými eru meðal helstu kosta eignarinnar. Hér er áhugaverður kostur fyrir aðila sem leita að húsnæði fyrir framleiðslu, vinnslu eða aðra atvinnustarfsemi sem samræmist skipulagi og leyfum.

Skipulag og aðstaða

Á jarðhæð eru rúmgóð vinnslurými með mikilli lofthæð og aðkomu um innkeyrsluhurðir. Húsið er skipulagt með aðskilnaði milli umferðarganga og vinnslusvæða. Við innganga í vinnslurými er hreinlætisaðstaða með handlaugum og aðstöðu fyrir vinnufatnað og skó.

Á aðaluppdráttum er gert ráð fyrir aðskildum vinnslusvæðum, rými fyrir sprautuþurrkara, pökkun og blöndun ásamt tæknirými. Í húsinu eru jafnframt geymslurými með hilluaðstöðu og þvottaaðstaða með vöskum og aðstöðu fyrir þvottavélar og þurrkara. Gólf í vinnslu- og geymslurýmum eru með yfirborðshúðun og víða eru gólfrennur og niðurföll.

Á efri hæð er björt kaffistofa og matsalur með gluggum, eldhúsinnréttingu, vaski, helluborði, bakaraofni og háfi. Þar eru einnig tvær snyrtingar, hol, geymsla og rými fyrir tölvu- og netbúnað. Aðgangur er að tæknipalli með loftræsibúnaði. Í starfsmannarýmum og á göngum efri hæðar er gólfefni með viðaráferð.

Innkeyrsluhurðir og aðkoma

Fimm innkeyrsluhurðir eru sýndar á aðaluppdráttum, tvær á öðrum gafli og þrjár á hinum. Stærsta hurðin er merkt 4,0 m á breidd og 5,0 m á hæð. Þrjár hurðir eru um 2,9–3,0 m á breidd og 4,0 m á hæð og ein minni hurð er 2,0 m á breidd og 2,4 m á hæð. Mál eru samkvæmt teikningum; raunverulegt opmál þarf að staðfesta eftir fyrirhugaðri notkun.

Malbikað er við hluta aðkomu og malarborið svæði er umhverfis húsið. Aðkoma að vinnslurýmum frá báðum göflum gefur möguleika á að aðgreina móttöku hráefnis, vinnslu og afhendingu afurða eftir þörfum rekstrar.

Bygging og tæknileg útfærsla

Samkvæmt byggingarlýsingu eru undirstöður og gólfplata úr járnbentri steinsteypu og burðarvirki vinnsluhúss úr límtré, með steyptum vegg að fyrirhuguðum viðbyggingarhluta. Útveggir og þak eru klædd einangruðum yleiningum með steinullareinangrun. Þak er einhalla og vatnsvarið með þakpappa. Milligólf starfsmannaaðstöðu er byggt upp á timburbitum. Gluggar og gönguhurðir eru samkvæmt lýsingu með álklæddum timburkörmum.

Í húsinu er vélræn loftræsing með loftræsisamstæðum og umfangsmiklum lagnaleiðum. Samkvæmt byggingarlýsingu er húsið tengt vatnsveitu Blönduóss og upphitun útfærð með varmaskipti, rafhitara og vatnshitablásurum í vinnslurýmum. Í tæknirými er gert ráð fyrir vatnsinntökum, rafbúnaði, varmadælubúnaði, hitakútum, gufukatli og CIP þvottakerfi fyrir vinnslubúnað.

Byggingarlýsing gerir ráð fyrir að frárennsli vinnsluvatns sé aðskilið grávatni og gólfniðurföll séu ryðfrí. Teikningar sýna sér spennistöð við húsið og aðskilin brunahólf fyrir spennirými, tæknirými og starfsmanna- og vinnslurými. Þar er einnig gerð grein fyrir brunaviðvörunarkerfi, neyðarlýsingu og flóttaleiðum, þar á meðal flóttasvölum frá efri hæð.

Fyrri nýting og möguleikar
Húsnæðið var byggt upp fyrir starfsemi Foodsmart Nordic á sviði fæðubótarefna úr sjávarafurðum. Í umfjöllun um uppbygginguna árið 2023 var meðal annars fjallað um kollagen úr fiskroði, fiskprótein og sæbjúgnaduft. Skipulag hússins og tæknileg útfærsla þess taka mið af slíkri framleiðslu.

Eignin getur því verið áhugaverð fyrir fyrirtæki í matvælavinnslu, framleiðslu fæðubótarefna eða annarri sérhæfðri framleiðslu. Einnig má kanna aðlögun að annarri atvinnustarfsemi. Hæfi húsnæðis og búnaðar fyrir tiltekinn rekstur þarf að meta sérstaklega með hliðsjón af fyrirhugaðri notkun og tilskildum leyfum.

Lóð og fyrirhuguð viðbygging
Lóðin er skráð 1.894 m² og er Húnabyggð skráð landeigandi. Á aðaluppdráttum er sýndur annar byggingaráfangi fyrir starfsmanna- og skrifstofuaðstöðu á tveimur hæðum. Sá hluti er ekki hluti af skráðri 423,3 m² stærð eignarinnar. Fyrirliggjandi teikningar geta nýst við skoðun á frekari uppbyggingu, en staðfesta þarf gildandi byggingarheimildir og skilmála hjá sveitarfélaginu.

Á afstöðumynd er jafnframt sýnd kvöð um yfirferðarrétt vestast á lóð. Nánari afmörkun réttinda og kvaða fer eftir þinglýstum gögnum og lóðarsamningi.

Ástand og búnaður

Í húsnæðinu við Ægisbraut 2 á Blönduósi hefur verið byggð upp sérhæfð aðstaða til vinnslu sjávarhráefna og framleiðslu duftafurða. Þar hefur meðal annars verið unnið kollagen úr þorsk- og ýsuroði og duft úr sæbjúgum. Aðstaðan hefur einnig verið nýtt til verktakavinnu við framleiðslu þangdufts og þurrkun kollagenþykknis.

Vinnslan nær yfir bæði blautvinnslu og þurrvinnslu. Hráefni er yfirfarið, hreinsað og hakkað áður en það fer í frekari meðhöndlun í vinnslutönkum. Þar fer meðal annars fram ensímniðurbrot við stýrðar aðstæður og gerilsneyðing. Í framhaldinu tekur við hreinsun í skilvindu, últrasíun, nanósíun og þykking með eimingu. Að lokum er afurðin gerilsneydd og úðaþurrkuð í duft.

Meðal búnaðar í verksmiðjunni er:
- Færibönd, hakkavél og tromla til hreinsunar hráefnis.
- Vinnslu-, hreinsi- og jöfnunartankar ásamt dælum og síum.
- Dekanterskilvinda til aðskilnaðar og hreinsunar.
- Últrasíunar- og nanósíunarbúnaður.
- Eimingarbúnaður til þykkingar afurða.
- Gerilsneyðingarbúnaður og úðaþurrkari.
- Rafmagnsketill, loftpressa og þrifakerfi.

Stórum hluta vinnsluferlisins er hægt að stýra frá skjám, en tiltekin verkþrep krefjast handvirkrar vinnu, meðal annars við hráefnismeðhöndlun, skömmtun og pökkun.

Aðstaðan getur verið áhugaverður kostur fyrir fyrirtæki sem vilja kanna möguleika á vinnslu sjávarhráefna, framleiðslu kollagens og annarra duftafurða eða verktakaþjónustu við þurrkun. Þar er fyrir hendi búnaður fyrir mörg samhangandi vinnsluskref, frá undirbúningi hráefnis til þurrkaðrar afurðar.

Upplýsingar veita Friðrik Halldór Brynjólfsson löggiltur fasteignasali s 662-8034 domus@domus.is,  Stefán Ólafsson hrl. löggiltur fasteignasali s 891-9425 sol@domus.is og Sigurður Pétur Stefánsson s 698-6971 siggi@domus.is

Forsendur söluyfirlits:
Söluyfirlit er samið af fasteignasala í samræmi við ákvæði laga nr. 70/2015. Þær upplýsingar sem fram koma í söluyfirliti þessu eru sóttar í opinberar skrár, til seljanda sjálfs og eftir atvikum til húsfélags. Seljandi veitir upplýsingar um eign í samræmi við upplýsingaskyldu laga um fasteignakaup nr. 40/2002. Fasteignasali sannreynir að þær upplýsingar séu réttar með sjónskoðun á eigninni.
Fasteignasali getur ekki fullyrt um ástand og eiginleika þeirra hluta fasteigna sem ekki eru aðgengilegir og sjást ekki berum augum, t.d. lagnir, dren, skólp og þak.

Um skoðunar- og aðgæsluskyldu:
Í lögum um fasteignakaup nr. 40/2002 er kveðið á um ríka skoðunarskyldu kaupenda á fasteignum. Domus Fasteignasala bendir væntanlegum kaupendum á að kynna sér vel ástand fasteigna við skoðun og fyrir tilboðsgerð og ef þurfa þykir að leita til sérfræðinga um nánari ástandsskoðun.

Gjöld sem kaupandi þarf að standa straum af vegna kaupanna:
1.Stimpilgjald af kaupsamningi sem er hlutfall af fasteignamati. Stimpilgjald er 0,8% fyrir einstaklinga (0,4% við fyrstu kaup) og 1,6% fyrir lögaðila.
2. Þinglýsingargjald af kaupsamningi, veðskuldabréfum, veðleyfum o.fl. Þinglýsingargjald er kr. 3.800,- fyrir hvert skjal.
3. Lántökugjald lánastofnunar. Um lántökugjald vísast í gjaldskrá viðkomandi lánveitanda.
4. Umsýslugjald kaupanda kr. 71.920 kr.
5. Þegar um nýbyggingu er að ræða greiðir kaupandi skipulagsgjald, 0,3% af endanlegu brunabótamáti, þegar það er lagt á.