Dalbrún 14

Sérlega fallegt og vel skipulagt fimm herbergja einbýlishús á einni hæð með innbyggðum 41,6 m² bílskúr. Húsið stendur á fallegum stað, innarlega í botnlangagötu með einstaka náttúru í bakgarðinum og grunn- og leikskóla við enda götunnar.
Stofa er rúmgóð með parketi á gólfi og útgengt á stóra timburverönd með skjólveggjum og heitum potti við suðurhlið hússins. Timburveröndin nær einnig fyrir hornið og meðfram allri bakhlið hússins. Gott útsýni er úr stofu þar sem Sandfell og Höttur blasa við á góðviðrisdögum. Parket er einnig í eldhúsi sem er með fallegri innréttingu með góðu skápaplássi. Tveir útskotsgluggar eru á stofu og eldhúsi sem hleypa birtu inn í rýmin. Baðherbergi var endurnýjað af fyrri eigendum; það er flísalagt með Fibo baðplötum á veggjum, sturtu, fínni innréttingu og handklæðaofni. Í húsinu eru fjögur svefnherbergi, öll með parketi á gólfi, stórum gluggum og innbyggðum fataskápum í þremur þeirra. Flísalagt þvottahús með innréttingu, hillum og plássi fyrir frystikistu er inn af eldhúsi og er þaðan útgengt í bakgarð. Forstofa er einnig með flísum og innbyggðum fataskáp. Allt parket í húsinu er sömu gerðar, rakaþolið Quick-Step harðparket frá Harðviðarvali sem lagt var árið 2018.
Bílskúr er rúmgóður með góðri lofthæð, rafknúinni bílskúrshurð með fjarstýringum og hita í gólfi. Yfir hluta bílskúrs er rúmgott milliloft en einnig er lokuð geymsla innst í bílskúr. Manngengar hurðir í bílskúr eru bæði að framan og í bakgarð. Lóðin er fullfrágengin með snjóbræðslu undir tröppum og hellulögn frá bílskúr að aðaldyrum. Garðurinn er gróinn og fallegur og rennur saman við villta náttúru og berjamóa. Í garði er útigeymsla, sandkassi, upphækkuð gróðurbeð og 14 m²  sérstyrkt gróðurhús frá Lágafelli með öryggisgleri og hellulögðu gólfi sem byggt var árið 2025.